पूर्वी चीनको सुजोउ सहरमा कमलका फूलले उद्योगको रूप लिँदै गएको छ। खेती, खानपान र पर्यटनलाई एकसाथ समेट्दै यो उद्योग दिनप्रतिदिन समृद्ध बन्दै छ।
यस उद्योगलाई जीवन्त राख्नेमध्ये ७४ वर्षीय एक किसान र उनकी श्रीमती पनि छन्। उनीहरू हरेक बिहान सबेरै उठेर ताजा कमलका फूल टिपी स्थानीय बजारमा बिक्री गर्छन्। यहाँका धेरै परिवारका लागि यो मौसमी काम खेतीको फुर्सदको समयमा आम्दानीको महत्त्वपूर्ण स्रोत बनेको छ।
किसान शेङ वेइछुआनका अनुसार, ‘१० मु (करिब ०.७ हेक्टर) क्षेत्रफलको कमल पोखरीबाट पहिले ३,००० देखि ४,५०० अमेरिकी डलरसम्म कमाउनु राम्रो मानिन्थ्यो। अहिले राम्रोसँग व्यवस्थापन गर्न सके ६,००० देखि ७,००० डलर वा सोभन्दा बढी पनि कमाउन सकिन्छ।’
अर्का किसान लिन सियाओवानले भने, ‘कमलका फूल बेचेर म दैनिक १५० देखि ३०० अमेरिकी डलरसम्म कमाउँछु। सबै खर्च कटाएपछि पनि दैनिक १०० देखि १३० डलर बचत हुन्छ।’
पर्यटकहरूका लागि यहाँको अनुभव ताजा फूल किन्नेमा मात्र सीमित छैन। डुंगामा सयर गर्दै कमलबाट बनेका परिकार र पेय पदार्थको स्वाद लिन सकिन्छ। साथै नजिकैका पसलहरूमा कमल–थिमका सिर्जनात्मक सामग्रीहरू पनि पाइन्छन्।
नान्जिङबाट आएका एक पर्यटकले भने, ‘मैले ७ अमेरिकी डलरमा कमलका फूलको एउटा गुच्छा र करिब १० डलरमा दुई वटा पेय पदार्थ किनेँ। यहाँको वातावरण निकै ताजगीपूर्ण छ। कमलको सुगन्ध र माहोलले भरिएको यो ठाउँ गर्मीयामका लागि एकदम उपयुक्त छ।’
तथ्याङ्कअनुसार, यो बजारबाट मात्रै दैनिक करिब ६०,००० अमेरिकी डलर बराबरको कारोबार हुन्छ र यसको सञ्चालन सेप्टेम्बरसम्म जारी रहन्छ। (सीसीटीभीप्लस)
