काठमाडौं। नेपाल कम्युनिस्ट पार्टी (नेकपा)का संस्थापक महासचिव पुष्पलालको ४८औँ स्मृति दिवस आज देशभर विभिन्न कार्यक्रम आयोजना गरी मनाइँदै छ।
पुष्पलालले विसं २००६ वैशाखमा निरञ्जनगोविन्द वैद्य, नारायणविलास जोशी, नरबहादुर कर्माचार्य र मोतीदेवी शाक्यसँग मिलेर भारतको कोलकातामा नेकपाको स्थापना गरेका थिए। यसभन्दा अघि विसं १९९८ मा उनले प्रेमबहादुर कंसाकार, शम्भुराम श्रेष्ठ, सूर्यबहादुर भारद्वाज र रामराजासँग मिलेर नेपाली प्रजातान्त्रिक संघ गठन गरेका थिए।
विसं १९८१ असार १५ गते रामेछापमा जन्मिएका पुष्पलाल पिता भक्तलाल र आमा तुलसीकुमारीका माहिला छोरा थिए। सहिद गंगालालका भाइ समेत रहेका पुष्पलालले प्रवासमा बसेरै नेकपाका गतिविधि सञ्चालन गरे।
उनले कार्ल माक्र्स र फेडरिक एङगेल्सद्वारा लिखित ‘कम्युनिस्ट मेनिफेस्टो’ पहिलो पटक नेपाली भाषामा अनुवाद गरेका थिए। साथै विभिन्न कृति र लेखमार्फत नेपाली समाजको वर्ग विश्लेषण पनि गरेका थिए। नेपाली कांग्रेससहित प्रजातान्त्रिक शक्तिसँग मिलेर संयुक्त जनआन्दोलन गर्दै पञ्चायती व्यवस्था परास्त गर्नुपर्ने उनको मत थियो।
पुष्पलालको विसं २०३५ साउन ७ गते भारतको नयाँदिल्लीमा उपचारका क्रममा निधन भएको थियो।
