फ्रान्सका कप्तान किलियन एमबाप्पेले मोरक्कोविरुद्धको क्वार्टरफाइनल खेलमा खुट्टाको घुँडामा (एंकल) सामान्य चोट लागे पनि स्पेनविरुद्ध हुने फिफा विश्वकप २०२६ को सेमिफाइनलका लागि उनी फिट रहने अपेक्षा गरिएको छ।
सेमिफाइनलअघि सञ्चारकर्मीसँग कुरा गर्दै फ्रान्सका मुख्य प्रशिक्षक डिडिएर डेसाम्प्सले एमबाप्पे खेल्न उपलब्ध रहने स्पष्ट पारे। ‘किलियन ठीक छन्,’ डेसाम्प्सले रोयटर्सलाई भने।
मोरक्कोविरुद्धको खेलमा चोट लागेपछि एमबाप्पेले अन्तिम प्रशिक्षण सत्र पूरा गर्न सकेका थिएनन् र खेलको अन्तिम समयमा उनलाई प्रतिस्थापन पनि गरिएको थियो। सावधानीका रूपमा उनको प्रशिक्षणको भार पनि कम गरिएको थियो। ‘हो, उनले प्रशिक्षण गरे। तर १५ मिनेटको सट्टा एउटा अभ्यासमा उनलाई १० मिनेट मात्र सहभागी हुन दिइयो,’ डेसाम्प्सले रोयटर्सलाई बताए। आंशिक आराम दिइए पनि यो चोटका कारण सेमिफाइनल गुमाउनुपर्ने अवस्था भने छैन।
सेमिफाइनलमा फ्रान्सको सामना उत्कृष्ट लयमा रहेको स्पेनसँग हुनेछ। स्पेनले क्वार्टरफाइनलमा बेल्जियमलाई २–१ ले पराजित गर्दै अन्तिम चारमा स्थान बनाएको थियो। लगातार ३६ खेलसम्म अपराजित रहेको स्पेन फाइनलमा पुग्ने लक्ष्यमा हुनेछ। यस सेमिफाइनलको विजेताले जुलाई १९ मा हुने उपाधि भिडन्तमा स्थान पाउनेछ।
नकआउट चरणमा फ्रान्स सबैभन्दा प्रभावशाली र सन्तुलित टोलीका रूपमा देखिएको छ। समूह ‘आई’ को विजेता बनेपछि फ्रान्सले राउन्ड अफ ३२ मा स्विडेनलाई ३–०, राउन्ड अफ १६ मा पाराग्वेलाई १–० र क्वार्टरफाइनलमा मोरक्कोलाई २–० ले पराजित गरेको थियो। नकआउट चरणमा फ्रान्सले ६ गोल गरेको छ भने एउटै गोल खाएको छैन, जसले दबाबका बेला पनि टोलीको बलियो र अनुशासित रक्षापंक्तिको झलक दिन्छ। कप्तान एमबाप्पेले निर्णायक क्षणहरूमा आक्रमणतर्फ टोलीलाई धार दिँदै आएका छन्। (एएनआई)
