काठमाडौं । अर्जेन्टिनाका कप्तान लियोनेल मेस्सीले फिफा विश्वकपको इतिहासमा अर्को अविस्मरणीय कीर्तिमान आफ्नो नाममा दर्ता गरेका छन्। अमेरिकाको मियामीमा भएको फिफा विश्वकप २०२६ को राउन्ड अफ ३२ अन्तर्गत केप भर्डेविरुद्धको खेलमा गोल गर्दै मेस्सी विश्वकप इतिहासमा लगातार आठ खेलमा गोल गर्ने पहिलो खेलाडी बनेका छन्।
खेलको २९औं मिनेटमा मेस्सीले गोल गर्दै अर्जेन्टिनालाई १–० को अग्रता दिलाएका थिए। यससँगै विश्वकपमा उनको व्यक्तिगत गोल संख्या २० पुगेको छ र सर्वाधिक गोल गर्ने खेलाडीको सूचीमा उनको स्थान अझ मजबुत बनेको छ।
तथ्यांक संस्था अप्टाका अनुसार मेस्सी विश्वकपका दुई फरक संस्करणमा सात–सात गोल गर्ने पहिलो फुटबलर पनि बनेका छन्। उनले कतारमा भएको २०२२ को विश्वकपमा सात गोल गरेका थिए भने जारी २०२६ संस्करणमा पनि सात गोल पूरा गरेका छन्। यससँगै उनी गोल्डेन बुटका प्रमुख दाबेदारमध्ये एक बनेका छन्।
नकआउट चरणको यो खेलअघि मेस्सी र फ्रान्सका कप्तान किलियन एम्बाप्पे दुवै ६–६ गोलसहित सर्वाधिक गोलकर्ताको सूचीमा संयुक्त रूपमा अग्रस्थानमा थिए। केप भर्डेविरुद्धको गोलपछि भने मेस्सी एक्लै शीर्ष स्थानमा पुगेका छन्।
यस खेलअघि नै मेस्सीले विश्वकपमा ३०औं खेल खेलेर अर्को कीर्तिमान बनाइसकेका थिए। उनी फिफा विश्वकपमा सर्वाधिक ३० खेल खेल्ने पहिलो फुटबलर बनेका छन्।
खेलको क्रममा पहिलो हाफमा अग्रता लिए पनि अर्जेन्टिनाले त्यसलाई जोगाउन सकेन। दोस्रो हाफको ५९औं मिनेटमा केप भर्डेका डेरोय डुआर्टेले बराबरी गोल गर्दै खेललाई १–१ मा पुर्याए। त्यसपछि मेस्सीले लगातार आक्रमण गरे पनि केप भर्डेका अनुभवी गोलरक्षक भोजिन्हाले उत्कृष्ट बचाउ गर्दै टोलीलाई खेलमा टिकाइराखे। निर्धारित ९० मिनेटसम्म थप गोल नभएपछि खेल अतिरिक्त समयमा प्रवेश गर्यो।
अतिरिक्त समयको दोस्रो मिनेटमै लिसान्ड्रो मार्टिनेजले गोल गर्दै अर्जेन्टिनालाई अग्रता दिलाए। त्यसको ११ मिनेटपछि भने सिड्नी लोप्स क्याब्रलले उत्कृष्ट गोल गर्दै केप भर्डेलाई दोस्रोपटक बराबरीमा फर्काए। तर, १११औं मिनेटमा डाइनी बोर्जेसको आत्मघाती गोलले केप भर्डेको यात्रा समाप्त भयो।
साविक विश्वविजेताविरुद्ध नवप्रवेशी केप भर्डेले उत्कृष्ट प्रदर्शन गर्दा पनि हारबाट जोगिन सकेन। अन्तिम १६ मा पुगेको अर्जेन्टिनाले अब क्वार्टरफाइनल प्रवेशका लागि इजिप्टसँग खेल्नेछ।
