काठमाडौं । नेपाली कांग्रेसको केन्द्रीय निर्वाचन समितिले विदेशमा रहेका नेपाली जनसम्पर्क समितिहरूलाई केन्द्रीय निर्वाचन समितिले तोकेको प्रतिनिधिको उपस्थितिमा मात्र महाधिवेशन गर्न निर्देशन दिएको छ।
वरिष्ठ अधिवक्ता प्रेमबहादुर खड्काको अध्यक्षतामा बुधबार ललितपुरस्थित पार्टीको केन्द्रीय कार्यालय बी.पी. स्मृति भवनमा बसेको केन्द्रीय निर्वाचन समितिको बैठकले यो निर्णय गरेको हो।
बैठकले नेपाली कांग्रेसको केन्द्रीय कार्यसमितिले २०८२ चैत ११ गते गरेको निर्णयअनुसार १५औँ महाधिवेशनको तयारीस्वरूप विदेशस्थित जनसम्पर्क समितिहरूको महाधिवेशन २०८३ साल साउन मसान्तभित्र सम्पन्न गर्ने कार्यतालिका कार्यान्वयन गर्न आवश्यक निर्देशन जारी गरेको छ।
नेपाली कांग्रेसको विधान, २०१७ (संशोधनसहित) को धारा १४(३) मा जनसम्पर्क समितिको अधिवेशन केन्द्रीय निर्वाचन समितिले तोकेको प्रतिनिधिको उपस्थितिमा हुनुपर्ने स्पष्ट व्यवस्था रहेको निर्वाचन समितिले जनाएको छ।
सोही व्यवस्थाअनुसार विदेशस्थित जनसम्पर्क समितिहरूले महाधिवेशनअघि सदस्यताको विवरण अनिवार्य रूपमा केन्द्रमा पठाई पार्टीको सदस्यता व्यवस्थापन केन्द्रीय समितिबाट स्वीकृति लिनुपर्नेछ। त्यसपछि मात्र निर्वाचन प्रयोजनका लागि केन्द्रीय निर्वाचन समितिले प्रतिनिधि खटाउने व्यवस्था रहेको समितिले जनाएको छ।
निर्वाचन समितिले महाधिवेशनको मिति तय भएपछि समयमै केन्द्रीय निर्वाचन समितिलाई जानकारी गराउन तथा समितिले तोकेको प्रतिनिधिको उपस्थितिमा मात्र महाधिवेशन सम्पन्न गर्न सबै विदेशस्थित नेपाली जनसम्पर्क समितिलाई परिपत्र गर्ने निर्णय पनि गरेको छ।
कांग्रेसले आगामी १५औँ महाधिवेशनलाई व्यवस्थित, पारदर्शी र विधानसम्मत बनाउन विदेशस्थित पार्टी संगठनहरूको अधिवेशनलाई पनि निर्धारित प्रक्रिया र कार्यतालिकाअनुसार अघि बढाउने तयारी गरेको छ।
