ताइवानमा ६.१ म्याग्निच्युडको भूकम्प

ताइवानको पूर्वी तटमा सोमबार ६.१ म्याग्निच्युडको भूकम्प गएपछि ताइपेईमा केही समयका लागि भवनहरू हल्लिए, तर क्षतिको तत्काल कुनै रिपोर्ट आएको छैन।

भूकम्पको गहिराइ २७.५ किलोमिटर (१७.१ माइल) थियो र यसको केन्द्रबिन्दु ताइवानको पूर्वी तटमा रहेको थियो, ह्वालियन काउन्टी र दक्षिणी जापानी टापु योनागुनीको बीचमा झन्डै आधा बाटोमा रहेको मौसम विभागले जनाएको छ।

भूकम्पको धक्का ताइवानभर महसुस भएको हुनसक्ने बताइएको छ।

ताइवान दुई टेक्टोनिक प्लेटको संगम नजिकै अवस्थित छ र भूकम्पको जोखिममा छ।

सन् २०१६ मा दक्षिणी ताइवानमा गएको भूकम्पमा १०० जनाभन्दा बढीको मृत्यु भएको थियो भने सन् १९९९ मा ७.३ म्याग्निच्युडको भूकम्पले २ हजारभन्दा बढीको ज्यान लिएको थियो।