काठमाडौं । दुई दिनसम्म लगातार वर्षा भएपछि दार्चुला र बैतडीका विभिन्न स्थानमा पहिरो खसेको छ। यसले सडक अवरुद्ध भई यात्रुहरू गन्तव्यमा पुग्न कठिनाइ भोगिरहेका छन्।
मंगलबार बिहान खसेको पहिरोका कारण दार्चुलाको मालिकार्जुन गाउँपालिका–४ का दुई स्थान र बैतडीको गोकुलेश्वर–लटिनाथ सडक खण्डको एक स्थानमा यातायात पूर्ण रूपमा ठप्प भएको प्रहरीले जनाएको छ।
प्रदेश ट्राफिक प्रहरी कार्यालय अत्तरियाका अनुसार ती मार्गमा हाल सवारीसाधन चल्न सकेको छैन। स्थानीय तहको समन्वयमा पहिरो हटाएर सडक खुलाउने काम भने तीव्र गतिमा भइरहेको छ।
प्रहरीले थप वर्षाका कारण पहिरोको जोखिम अझै रहेको बताउँदै अत्यावश्यक काम बाहेक यात्रा नगर्न र यात्रा गर्नैपर्ने अवस्थामा उच्च सतर्कता अपनाउन सर्वसाधारणलाई आग्रह गरेको छ। मौसममा सुधार नआएसम्म जोखिमयुक्त सडक खण्डमा विशेष सावधानी अपनाउन पनि अनुरोध गरिएको छ।
