काठमाडौं । फिफा विश्वकप २०२६ को फाइनलमा स्पेनसँग पराजित भएपछि अर्जेन्टिनाका डिफेन्डर लिसान्द्रो मार्टिनेजले आफ्ना समर्थकका नाममा मन छुने सन्देश सार्वजनिक गरेका छन् ।
उपाधि रक्षाको अभियानमा रहेको अर्जेन्टिना फाइनलमा स्पेनसँग अतिरिक्त समयमा १–० ले पराजित भएको थियो । सो पराजयपछि म्यानचेस्टर युनाइटेडका डिफेन्डर मार्टिनेजले सामाजिक सञ्जाल ‘एक्स’मार्फत समर्थकप्रति आभार व्यक्त गरे ।
‘हामी सबैले योग्य ठानेको ट्रफी घर ल्याउन नसकेको पीडासहित पनि यो जर्सी, मेरा सहकर्मी खेलाडी, प्रशिक्षक टोली र सम्पूर्ण टिमप्रति गर्व छ,’ उनले लेखे । साथै, टोलीको सफलतामा खेलाडी मात्र नभई व्यवस्थापक, मेडिकल टोली, खाना बनाउने कर्मचारी र किट व्यवस्थापन गर्ने सबैको योगदान रहेको उनले उल्लेख गरे ।
मार्टिनेजले समर्थकले देखाएको माया, समर्थन र एकताप्रति धन्यवाद दिँदै भने, ‘हामीले धेरै कठिनाइ सामना गर्यौं, असम्भव जस्तो देखिएका कुरालाई सम्भव बनायौं र कहिल्यै बहाना खोजेनौं, अघि बढ्ने कारण खोज्यौं ।’ फाइनलको एउटा नतिजाले पूरै यात्राको मूल्यांकन हुन नहुने उनको भनाइ छ ।
उनले विश्वकप विजेता स्पेनलाई बधाई दिँदै टोलीले योग्य रूपमा उपाधि जितेको स्वीकार गरे । अर्जेन्टिनाको राष्ट्रिय टोलीबाट खेल्न पाउनु आफ्नो जीवनकै ठूलो गर्व भएको बताउँदै उनले समर्थकलाई देशको माया र एकता कायम राख्न आग्रह गरे । ‘धेरै धेरै धन्यवाद । हाम्रो देशको ख्याल राखौं । म अर्जेन्टिनालाई धेरै माया गर्छु,’ उनले सन्देशको अन्त्यमा लेखेका छन् ।
