काठमाडौं । नेपाल–भारत उद्योग वाणिज्य संघ र हाउस अफ राजकर्णिकारले काठमाडौंमा ‘नेपाल–इन्डिया फुड एन्ड बेभरेज फोरम २०२६’ को आयोजना गरेका छन्। यस फोरमले नेपालको खाद्य, पेय पदार्थ र आतिथ्यता क्षेत्रका प्रमुख सरोकारवालाहरूलाई एकै ठाउँमा भेला गराई नेपाल–भारतबीच द्विपक्षीय सहकार्य विस्तारका सम्भावनाहरूमा छलफल गर्ने अवसर प्रदान गर्यो।
यो कार्यक्रम निकट भविष्यमा भारतमा हुन लागेको अन्तर्राष्ट्रिय प्रदर्शनीको पूर्वतयारीका रूपमा आयोजना गरिएको हो। उक्त प्रदर्शनी आगामी ११–१३ सेप्टेम्बर २०२६ मा भारतको वाराणसीस्थित गिरिजा देवी संस्कृत सङ्कुलमा हुने निर्धारण गरिएको छ। भारतीय बजारमा आफ्नो पहुँच विस्तार गर्न चाहने नेपाली व्यवसायीहरूलाई यस प्रदर्शनीमा सहभागी हुन प्रोत्साहित गर्नु पनि यस फोरमको मुख्य उद्देश्य रहेको थियो।
कार्यक्रममा नेपाल–भारत उद्योग वाणिज्य संघका उपाध्यक्ष कुनाल कायलले खाद्य, पेय पदार्थ र आतिथ्य क्षेत्रमार्फत दुई देशबीचको आर्थिक सहकार्य सुदृढ बनाउन यस्ता कार्यक्रमहरू अत्यन्त महत्त्वपूर्ण रहेको बताए। उनले यस्ता उद्योग–केन्द्रित फोरमहरूले व्यवसायिक सञ्जाल विस्तार, बजार पहुँच वृद्धि र भारतीय सरोकारवालासँग सीमापार साझेदारी कायम गर्न ठूलो भूमिका खेल्ने विश्वास पनि व्यक्त गरे।
हाउस अफ राजकर्णिकारका अध्यक्ष वीरेन्द्र राजकर्णिकारले आफ्नो संस्थाको परिचय दिँदै व्यापार र उद्योग सहकार्य प्रवर्द्धनका लागि संस्थाले चालेका विभिन्न पहलहरूबारे जानकारी गराए। यसैगरी राजन शर्माले विशेषज्ञ प्रस्तुति दिँदै नेपाल–भारत व्यापार मेला प्रदर्शनीका उद्देश्य, व्यावसायिक अवसर, प्रदर्शकहरूले ध्यान दिनुपर्ने चुनौती र वाराणसी प्रदर्शनीमा सहभागी नेपाली उद्यमहरूले पाउन सक्ने सम्भावित लाभहरूबारे विस्तृत जानकारी दिए।
फोरममा होटल, रेस्टुरेन्ट र क्याटरिङ उद्योगका प्रतिनिधि, खाद्य तथा पेय पदार्थ उत्पादक, आतिथ्य व्यवसायी, उद्यमी, निर्यातकर्ता, वितरक लगायत विभिन्न क्षेत्रका सरोकारवालाहरूको उल्लेखनीय सहभागिता रह्यो। सहभागीहरूले नेपाल–भारतबीच द्विपक्षीय व्यापार विस्तार, बजार पहुँच अभिवृद्धि र सुदृढ व्यावसायिक साझेदारी विकासका विषयमा गहन विचार–विमर्श गरे।
नेपाल–भारत उद्योग वाणिज्य संघले यस्ता पहलमार्फत दुवै देशका व्यवसायीहरूबीच अर्थपूर्ण संवाद कायम राख्दै व्यापार, लगानी र विभिन्न क्षेत्रमा आर्थिक सहकार्य प्रवर्द्धन गर्ने आफ्नो प्रतिबद्धता दोहोर्याएको छ।
