काठमाडौँ । रोटरी डिस्ट्रिक्ट ३२९२ अन्तर्गत नयाँ क्लबको रूपमा स्थापना भएको रोटरी क्लब अफ नेपाल मण्डलको चार्टर सर्टिफिकेट प्रदान तथा प्रथम पदस्थापन समारोह शुक्रबार ललितपुरको झम्सीखेलस्थित होटल स्क्वायरमा सम्पन्न भयो।
गत २४ जुन २०२६ मा रोटरी अन्तर्राष्ट्रियबाट आधिकारिक स्वीकृति (चार्टर) प्राप्त गरेको यस क्लबको औपचारिक यात्राको शुभारम्भ अवसरमा यो विशेष समारोह आयोजना गरिएको थियो।
कार्यक्रमका मुख्य अतिथि एवं रोटरी डिस्ट्रिक्ट ३२९२ का डिस्ट्रिक्ट गभर्नर विष्णु बहादुर कार्कीले क्लबका चार्टर प्रेसिडेन्ट देवेन्द्र लाल श्रेष्ठलाई रोटरी अन्तर्राष्ट्रियको चार्टर सर्टिफिकेट औपचारिक रूपमा हस्तान्तरण गरे। त्यसपछि डिस्ट्रिक्ट गभर्नर कार्कीले रोटरी वर्ष २०२६/२७ का लागि नवनिर्वाचित अध्यक्ष उत्तम बाबु भट्टराईलाई पद तथा गोपनीयताको शपथ ग्रहण गराउँदै प्रेसिडेन्सियल कलर पनि पहिराए। त्यसपछि नवनिर्वाचित अध्यक्ष भट्टराईले नयाँ कार्यसमितिका पदाधिकारी तथा सदस्यहरूलाई शपथ गराए।
समारोहमा मदन पुरस्कार विजेता वरिष्ठ साहित्यकार युवराज नयाँघरे, डिस्ट्रिक्टका पूर्व गभर्नरहरू, असिस्टेन्ट गभर्नर दीपक श्रेष्ठ, न्यु क्लब एडभाइजर एजाज आलमलगायत विभिन्न रोटरी क्लबका नेतृत्वकर्ताहरू, सञ्चारकर्मी तथा मानवअधिकारकर्मीहरूको उल्लेख्य उपस्थिति रह्यो। कार्यक्रमको सञ्चालन पास्ट प्रेसिडेन्ट छेवाङ ङुडुपले गरे भने स्वागत मन्तव्य संयोजक डा. शङ्कर प्रसाद आचार्यले राखे।
पदभार ग्रहण गरेपछि आफ्नो प्रतिबद्धता व्यक्त गर्दै अध्यक्ष उत्तम बाबु भट्टराईले यस वर्षको रोटरी नारा ‘दिगो प्रभाव सिर्जना गरौँ’ लाई आत्मसात् गर्दै क्लबले स्वास्थ्य, शिक्षा र वातावरणका क्षेत्रमा ठोस कार्य गर्ने प्रतिबद्धता जनाए।
क्लबको प्रमुख योजनाका रूपमा ‘माउन्टेन क्लिनिङ प्रोग्राम’ घोषणा गरिएको छ। यस अन्तर्गत क्लबका उपाध्यक्ष एवं पर्वतारोही गाइड छिरिङ जाङ्बु शेर्पाले आगामी महिनादेखि सुरु गर्ने १,७०० किलोमिटर लामो ‘ग्रेट हिमालयन ट्रेल’ पैदल यात्राका क्रममा हिमाली क्षेत्रमा फोहोर व्यवस्थापन र चेतना अभिवृद्धिका कार्यक्रम सञ्चालन गरिने अध्यक्ष भट्टराईले जानकारी दिए।
यसका अतिरिक्त क्लबले सामुदायिक विद्यालयहरूमा छात्रामैत्री शौचालय निर्माण, छात्रवृत्ति कोष स्थापना, ज्येष्ठ नागरिकका लागि स्वास्थ्य शिविर, ‘आरसीसी कालिञ्चोक’ तथा ‘रोट्र्याक्ट क्लब अफ नेपाल मण्डल’ को स्थापनाजस्ता सामाजिक कार्यहरू तत्काल अघि बढाउने लक्ष्य राखेको छ।
नयाँ क्लब भए तापनि द रोटरी फाउन्डेसनमा क्लबका सबै २२ सदस्यले प्रतिव्यक्ति १०० अमेरिकी डलरका दरले कुल २,२०० डलर योगदान गर्दै स्थापनाकै दिन ‘रोटरी फाउन्डेसन सस्टेनेबल मेम्बर क्लब’ को मान्यता प्राप्त गरेको घोषणा गरियो।
समारोहको अन्त्यमा प्रेसिडेन्ट इलेक्ट विश्व जय सिंह शाहीले धन्यवाद ज्ञापन गर्नुभयो भने रोटरी परम्परा अनुसार देशको समृद्धि तथा विश्व शान्तिका लागि टोस्ट प्रस्ताव गर्दै कार्यक्रम समापन भयो।
