काठमाडौं । चालु आर्थिक वर्ष २०८२/८३ को तेस्रो त्रैमासमा नेपालको अर्थतन्त्र ३.५१ प्रतिशतले वृद्धि हुने प्रारम्भिक अनुमान गरिएको छ। राष्ट्रिय तथ्याङ्क कार्यालयले सोमबार सार्वजनिक गरेको त्रैमासिक राष्ट्रिय लेखा तथ्याङ्कअनुसार विद्युत् उत्पादन तथा वितरण, बैंकिङ तथा बीमा, व्यापार र यातायात क्षेत्रको विस्तारले यो वृद्धिलाई टेवा दिएको हो।
तथ्याङ्कअनुसार तेस्रो त्रैमासमा अर्थतन्त्रका १८ औद्योगिक वर्गीकरणमध्ये १६ वटामा सकारात्मक वृद्धि देखिएको छ। विद्युत् तथा ग्यास क्षेत्र सबैभन्दा बढी २४.८८ प्रतिशतले विस्तार भएको छ। यसैगरी वित्तीय तथा बीमा क्षेत्र १०.२७ प्रतिशत, यातायात तथा भण्डारण ७.८३ प्रतिशत र थोक तथा खुद्रा व्यापार क्षेत्र ५.२५ प्रतिशतले बढेको प्रारम्भिक अनुमान छ।
तथापि कृषि र औद्योगिक क्षेत्रमा देखिएको सुस्तताले समग्र आर्थिक वृद्धिलाई अपेक्षित गतिमा पुग्न दिएको छैन। अर्थतन्त्रमा सबैभन्दा ठूलो योगदान पुर्याउने कृषि क्षेत्र १.५८ प्रतिशतमात्र बढेको छ, उत्पादनमूलक उद्योग ०.५४ प्रतिशतले खुम्चिएको छ र सार्वजनिक प्रशासन तथा रक्षा क्षेत्र १.५९ प्रतिशतले ऋणात्मक रहेको छ।
राष्ट्रिय तथ्याङ्क कार्यालयका अनुसार निर्माण सामग्रीको आयातमा आएको कमी, धान उत्पादनमा गिरावट र केही वस्तुको स्वदेशी उत्पादन घटेकाले आर्थिक वृद्धिदर सामान्य रहेको हो। यद्यपि ऊर्जा उत्पादन र सेवा क्षेत्रको विस्तारले अर्थतन्त्रलाई सकारात्मक दिशामा अघि बढाउन महत्त्वपूर्ण भूमिका खेलेको प्रतिवेदनमा उल्लेख छ।
मौसमी प्रभाव समायोजनपछि हेर्दा दोस्रो त्रैमासको तुलनामा तेस्रो त्रैमासमा अर्थतन्त्र ०.५८ प्रतिशतले विस्तार भएको प्रारम्भिक अनुमान गरिएको छ। कार्यालयका अनुसार यस्तो त्रैमासिक तथ्याङ्कले अर्थतन्त्रको छोटो अवधिको अवस्था र विभिन्न क्षेत्रको गतिविधिबारे संकेत गर्ने भएकाले नीति निर्माण तथा आर्थिक विश्लेषणको लागि यो महत्त्वपूर्ण आधारका रूपमा प्रयोग गरिन्छ।
