लन्डन । गैरआवासीय नेपाली संघ (एनआरएनए) का पूर्वअध्यक्ष कुल आचार्यले नेपालका ठूला पूर्वाधार, जलविद्युत र पर्यटन क्षेत्रमा लगानी भित्र्याउन बेलायतस्थित नेपाली डायस्पोरा र विदेशी लगानीकर्ताहरूलाई आग्रह गरेका छन्।
लन्डनस्थित नेपाली दूतावासमा आयोजित व्यापार तथा लगानी प्रवर्द्धन सम्मेलनमा कार्यपत्र प्रस्तुत गर्दै आचार्यले यस्तो आह्वान गरेका हुन्।
आफू एनआरएनएको नेतृत्वमा रहँदा नेपालमा गैरआवासीय नेपाली नागरिकता सुनिश्चित गर्न लामो संघर्ष गरेको उनले स्मरण गरे। लामो प्रयासपछि पहिलो एनआरएन नागरिकता लिने अवसर पाएको बताउँदै उनले भने, नागरिकताको कानुनी झन्झट अन्त्य भएपछि सबैले निर्धक्क भएर लगानी गर्ने वातावरण बन्नेछ।
दुई ठूला आर्थिक महाशक्ति र विशाल जनसंख्या भएका छिमेकी मुलुक चीन र भारतको बीचमा रहेकाले नेपालमा बजार र विकासको प्रचुर सम्भावना रहेको उनले प्रष्ट पारे।
बेलायतमा सुरुवाती दिनमा संघर्ष गर्दै ‘होली काउ’ व्यवसायमार्फत अहिलेको स्थितिमा पुगेको आफ्नो अनुभव पनि उनले सहभागीहरूसँग साझा गरे।
आचार्यले सन् २०१२ मा संयुक्त लगानीको अवधारणा अघि सारिएको र सोही पहलस्वरूप सन् २०१७ मा ‘एनआरएनए इन्फ्रास्ट्रक्चर एन्ड डेभलपमेन्ट कम्पनी’ स्थापना भएको जानकारी दिए। उक्त कम्पनी सन् २०२० मा नेपालको सेयर बजार (नेप्से) मा सूचीकृत भइसकेको छ। कम्पनीले लगानीकर्ताहरूलाई राम्रो मुनाफा वितरण गरिरहेको बताउँदै गैरआवासीय नेपालीहरूको सामूहिक लगानीमा विभिन्न जलविद्युत आयोजना र अन्य क्षेत्रमा तीव्र गतिमा काम भइरहेको उनले उल्लेख गरे।
नेपालमा सुरक्षित लगानीका लागि त्यहाँका स्थापित र विश्वसनीय व्यावसायिक घरानाहरूसँग रणनीतिक साझेदारी भइरहेको पनि आचार्यले बताए। नेपाल उद्योग वाणिज्य महासंघका निवर्तमान अध्यक्ष चन्द्रप्रसाद ढकाल नेतृत्वको आईएमई ग्रुपसँग मिलेर ‘हिमालय पावर पार्टनर’ लगायतका हाइड्रो परियोजनामा सहकार्य भइरहेको उनले जानकारी दिए।
त्यसैगरी, रुसमा रहेका नेपाली उद्यमीहरूद्वारा स्थापित सानिमा ग्रुपसँग मिलेर विभिन्न हाइड्रो र बैंकहरूमा लगानी गरिएको र बेलायतका केही कम्पनीहरूले पनि नेपालमा लगानी विस्तार गरिरहेको उनले बताए।
आचार्यले नेपालको पूर्वाधार र जलविद्युत क्षेत्रको अर्को ठूलो लगानीकर्ता ‘केसी ग्रुप’ सँगको सहकार्यबारे पनि जानकारी दिए। उक्त ग्रुपसँग मिलेर जलविद्युत, सर्भिस सेन्टर, पर्यटन, हस्पिटालिटी र अपार्टमेन्ट परियोजनाहरू सञ्चालन गर्न लागिएको बताउँदै उनले भने, ‘आउनुहोस्, सँगै बसेर छलफल गरौँ। हामी नेपालमा जलविद्युत, होटल लगायतका क्षेत्रमा थप लगानी गर्न पूर्ण रूपमा तयार छौँ।’
विभिन्न चुनौतीका बाबजुद भैरहवा (लुम्बिनी) मा रहेको ‘टाइगर प्यालेस रिसोर्ट’ सफलतापूर्वक सञ्चालन भइरहेको पनि उनले उल्लेख गरे। नेपालकै सबैभन्दा ठूलो क्यासिनो र आकर्षक स्विमिङ पुल भएको उक्त रिसोर्टमा हाल ११ सयभन्दा बढी व्यक्तिले रोजगारी पाएका छन्। यसमा बेलायत र अमेरिकाका गैरआवासीय नेपाली व्यवसायीहरूको संयुक्त साझेदारी रहेको उनले स्पष्ट पारे।
सम्मेलनको अन्त्यमा आचार्यले नेपालमा उद्यमशीलता र लगानी प्रवर्द्धनका लागि अथक रूपमा खटिने युवा अनुसन्धानकर्ता तथा नेपाली दूतावासका अधिकारीहरूलाई धन्यवाद दिए। साथै, बेलायतमा रहेका नेपालीहरूलाई छिट्टै एक गोलमेच बैठकमा बसी बृहत् लगानीको प्रतिबद्धता जनाउन र मातृभूमिको आर्थिक रूपान्तरणमा साझेदार बन्न पनि उनले अपिल गरे।
