काठमाडौं। राहदानी विभागले राहदानी जारी गर्ने प्रणाली स्तरोन्नति गरी नयाँ प्रणाली लागू गर्ने तयारी थालेको छ। यस क्रममा देशभरका जिल्ला तथा इलाका प्रशासन कार्यालय र विदेशस्थित नेपाली नियोगहरूबाट प्रदान गरिने राहदानी सेवा केही दिनका लागि पूर्ण रूपमा बन्द हुनेछ।
विभागले बिहीबार जारी गरेको जरुरी सूचनाअनुसार जिल्ला तथा इलाका प्रशासन कार्यालय र विदेशस्थित नेपाली नियोगहरूको राहदानी सेवा असार २४ देखि २६ गतेसम्म तीन दिन पूर्ण रूपमा बन्द रहनेछ। त्यसैगरी, राहदानी विभागबाट प्रत्यक्ष रूपमा दिइने सेवा असार २५ र २६ गते दुई दिनका लागि स्थगित हुनेछ।
आगामी असार २९ गतेदेखि भने नयाँ प्रणालीमार्फत राहदानी सेवा नियमित रूपमा सञ्चालनमा आउनेछ।
विभागले नयाँ प्रणाली लागू भएपछि सेवा थप सुरक्षित, प्रभावकारी र व्यवस्थित हुने विश्वास व्यक्त गरेको छ। साथै, प्रणाली स्तरोन्नतिको अवधिमा सेवाग्राहीलाई हुन सक्ने असुविधाप्रति विभागले क्षमायाचना गर्दै सबैसँग सहयोग र सहकार्यको अनुरोध गरेको छ।
