काठमाडौं । जनता समाजवादी पार्टी (जसपा) नेपालको जारी एकता महाधिवेशनमा निर्वाचन प्रक्रिया सुरु भएको छ ।
पार्टीको भावी नेतृत्व चयनका लागि आज निर्वाचन प्रक्रिया सुरु भएको हो । अधिवेशनको तेस्रो दिन आज बिहानैदेखि नेतृत्व चयनका लागि निर्वाचन प्रक्रिया सुरु भएको प्रवक्ता मनिष सुमनले जानकारी दिएका छन् ।
बिहान साढे ८ बजेदेखि उम्मेदवारी दर्ताको प्रक्रिया सुरु भएको थियाे । उम्मेदवारको नामावली १० बजे प्रकाशन गर्ने निर्वाचन तालिका छ । पदाधिकारी तथा सदस्यहरूको मनोनयन पत्रमाथि दाबी विरोधका लागि १० बजेदेखि ११ बजेसम्मको समय तोकिएको निर्वाचन समितिले जनाएको छ ।
साढे ११ बजेदेखि साढे २ बजेसम्म मनोनयन पत्र फिर्ता लिनका लागि समय दिइएको छ ।उम्मेदवारको अन्तिम नामावली दिउँसो ३ बजे प्रकाशन गर्ने तालिका छ । दिउँसाे ४ बजेदेखि बेलुकी ८ बजेसम्म मतदान हुने निर्वाचन समितिले जनाएको छ । अध्यक्षमा उपेन्द्र यादव नै दोहोरिने निश्चित छ ।
