काठमाडौं । नेपाल संसारको सबैभन्दा खुशी हुने देशको ९३औँ स्थानमा रहेको विश्व खुशी प्रतिवेदनको तथ्यांकले देखाएको छ । विश्व खुशी प्रतिवेदन, २०२४ अनुसार एक सय ४३ देशहरुमध्ये खुशीको सुचांकमा नेपालले ९३ औं स्थान प्राप्त गरेको हो ।
उक्त प्रतिवेदनअनुसार उक्त सूचीको पहिलो स्थानमा फिनल्याण्ड छ । फिनल्याण्ड लगातार सात वर्षदेखि शीर्ष स्थानमा रहँदै आएको छ । यो रिर्पाेट सन् २०१२ देखि प्रकाशित हुँदै आएको छ ।
यस्तै,फिनल्याण्डपछि दोस्रोमा डेनमार्क, तेस्रोमा आइसल्याण्ड, स्वीडेन, इजरायल, नेदरल्याण्ड, नर्वे, लक्जमवर्ग, स्वीजरल्याण्ड र दशौँ स्थानमा अस्टे«लिया रहेको छ ।
नेपालभन्दा अगाडि इराक, जर्जिया, मोजाम्बिक, लगायत ८९ वटा देशहरु रहेका छन् भने नेपालपछि लाओस, ग्याबोन, आइवरी कोस्ट र अन्य ४७ वटा देशहरु रहेका छन् ।
सूचीअनुसार अफगानिस्तान विश्वकै सबैभन्दा दुःखी देश बनेको छ । अफगानिस्तान १ सय ४३ स्थानमा छ । प्रतिवेदनका अनुसार ३० वर्षमुनि उमेर समूहमा खुशी हुने स्थानमा भने नेपाल ९२औँ स्थानमा छ ।
उक्त प्रतिवेदन गलुप, अक्सफोर्ड विश्वविद्यालय, वेलबिइङ रिसर्च सेन्टर, संयुक्त राष्ट्रसंघ दिगो विकास सोलुसन नेटवर्क र डब्लुएचआर्स एडिटोरियल बोर्डले प्रकाशन गरेको हो ।
प्रतिव्यक्ति वास्तविक जीडीपी, सामाजिक समर्थन, स्वस्थ औषत आयु, जीवन छनौट गर्ने स्वतन्त्रता, उदारता र भ्रष्टाचारको धारणाहरु जस्ता विभिन्न तत्वहरुका आधारमा विश्व खुशी प्रतिवेदनले देशहरुलाई क्रमबद्ध गरेको हो ।
मुख्यतः जीवन मूल्यांकनका प्रश्न उत्तरलाई आधार मानी प्रतिवेदन तयार पारिएको जनाइएको छ ।
