काठमाडौं । इन्डियन प्रिमियर लिग (आईपिएल) अन्तर्गत गएराति भएको खेलमा गुजरात टाइटन्समाथि दिल्ली क्यापिटल्सले चार रनको जित निकालेको छ। अन्तिम ओभरमा तीन बल डट खेल्दा गुजरात चार रनले पराजित भएको हो ।
अरुण जेटली स्टेडियममा टस हारेर पहिला ब्याटिङ गरेको दिल्लीले २० ओभरमा ४ विकेट गुमाउँदै २२४ रन बनाएको थियो । २२५ रनको लक्ष्य पछ्याएको गुजरात आठ विकेटको क्षतिमा २२० रनमा समेटिएको हो । दिल्लीले दिएको २२५ रनको लक्ष्य पछ्याएको गुजरातका लागि साई सुदर्शन र डेभिड मिलरले बनाएको अर्धशतक पनि काम लागेन ।
गुजरातलाई सस्तैमा समेट्न दिल्लीका रसिक सलमानले सर्वाधिक तीन विकेट हात पारे । कुलदीप यादवले दुई विकेट लिँदा मुकेश कुमार, अक्षर पटेल र एनरिक नोर्त्जेले एकएक विकेट हात पारे ।
सुरुमा ब्याटिङ गरेको दिल्लीले २० ओभरमा ४ विकेटको क्षतिमा २२४ रन बनाएको थियो । २२५ रनको चुनौतीका लागि दिल्लीका ऋषभ पन्तले नटआउट ८८ रन बनाए । ४३ बल खेलेका उनले ५ चौका र ८ छक्का प्रहार गरे ।
९ खेलबाट ८ अंक जोडेको दिल्ली अंक तालिकाको छैटौँ स्थानमा उक्लिएको छ । पराजित गुजरात समान खेलमा ८ अंक जोड्दै सातौँ स्थानमा समेटिएको छ । आईपिएल अन्तर्गत बिहीबार सनराइजर्स हैदरावाद र रोयल च्यालेन्जर्स बंग्लोरुबीच साँझ ७ः४५ बजे खेल हुनेछ।
