बाली । इन्डोनेशियाले चर्चित पर्यटकीय स्थल बालीमा नयाँ होटल, भिला र नाइट क्लब निर्माणमा रोक लगाउने भएको छ । अत्यधिक निर्माण र थेग्नै नसक्ने पर्यटकको भारसँग जुधिरहेको समयमा सरकारले होटल निर्माणमा रोक लगाउन लागेको हो ।
बालीको पर्यटन क्षेत्रको सुधार गर्ने सरकारी प्रयास अन्तर्गत सो रोक लगाइएको बताइएको छ । यति बेला इन्डोनेशिया सरकार टापुको आदिवासी संस्कृति जोगाउँदै पर्यटकीय सेवाको गुणस्तर र जागिर बढाउने प्रयासमा छ ।
सरकारले प्रतिबन्ध लगाउन सहमति गरिसकेको तर यो लागू हुने म्यादबारे छलफल भइरहेको समुद्री तथा लगानी मामिला मन्त्रालयका एक वरिष्ठ अधिकारी हर्मिन एस्टीले भनेका छन् । बालीका चार व्यस्त क्षेत्रमा सो रोक लगाउन आफूले केन्द्र सरकारलाई सुझाव दिएको शनिबार बालीका अन्तरिम गभर्नर साङ मेड महेन्द्रा जयले भनेका थिए । यो रोक १० वर्षसम्म लाग्न सक्ने बताइएको छ ।
