जेरुसेलम । गाजामा रहेको संयुक्त राष्ट्र संघले सञ्चालन गरिरहको एक विद्यालयमा इजरायली सेनाले आक्रमण गर्दा कम्तीमा १८ जनाको ज्यान गएको छ ।
प्रत्यक्षदर्शीका अनुसार ‘महिला र बच्चाहरू’ टुक्राटुक्रा भएका छन् । यसरी मारिने मध्ये ६ जना युनाइटेड नेसन रिलिफ एन्ड वर्क एजेन्सीमा आबद्ध थिए। युद्ध सुरु भएयता त्यहाँका कर्मचारीको ज्यान नै जाने गरी भएको यो सबैभन्दा ठूलो हमला हो। सो आक्रमणमा सेल्टरका मेनेजरकोसमेत मृत्यु भएको छ ।
पछिल्लो अवस्था हेर्दा त्यहाँ भुइँमा फोहोर छरिएका छन् । रगत सुक्दै गएपछि वातावरण नै दुर्गन्धित भएको छ । प्रत्यक्षदर्शीका अनुसार मानिस खाना पर्खिरहेको समयमा सो आक्रमण भएको थियो ।
इजरायल गाजा युद्धमा अहिलेसम्म ४१ हजारभन्दा बढीको ज्यान गएको छ भने ९५ हजार भन्दा बढी विस्थापित भएका छन्। पछिल्लो घटना अनुसार एक ४६ वर्षीया महिलाको छातीमा गोली हानेर हत्या गरिएको छ।
गत वर्षको ७ अक्टोबरदेखि सुरु भएको यस युद्धमा हरेक दिन यस्ता बिभत्स घटना भएका छन् । यसैबीच, हमासले वार्ताको मध्यस्थता गरिरहको पक्षसँग युद्ध विरामका लागि आफूहरू तयार रहेको जानकारी गराएको छ । यस युद्धमा इजिप्ट र कतारले मध्यस्थता गरिरहेका छन्। इजरायलले लगातार आक्रमण गरेको छ भने हमासले बन्दीकोसमेत हत्या गरिसकेको छ।एजेन्सी
